Тауанов Жандос Төреғұлұлы – материалдар химиясы саласының PhD докторы, химиялық инжиниринг магистрі. Қазіргі уақытта ол әл-Фараби атындағы Қазақ ұлттық университетінің Химиялық физика және материалтану кафедрасының меңгерушісі қызметін атқарады. Бұған дейін Ж.Т. Тауанов 2024– 2025 жылдары ҚазҰУ-дың «Экология және биоресурстар тұрақтылығы» ғылыми-зерттеу институты директорының орынбасары қызметін атқарған. Ол сондай-ақ 2019–2020 жылдары Чунгнам ұлттық университетінде (Оңтүстік Корея) постдокторант және 2016–2019 жылдары Назарбаев университетінің Экологиялық ғылымдар және технологиялар тобының (ESTg) аға ғылыми қызметкері болған. Жандос Төреғұлұлы – Қазақстан Республикасы Ғылым және жоғары білім министрлігі Ғылым комитеті қаржыландыратын ғылыми жобалардың жетекшісі. Ол 2021 және 2022 жылдары KAUST университетінің (Сауд Арабиясы) SRSI бағдарламасы бойынша физика ғылымдарының тьюторы ретінде шақырылған. Сонымен қатар, Кореялық зерттеу стипендиясының (KRF, 2019–2020), Қазақстанның дарынды жас ғалымдарға арналған мемлекеттік стипендиясының (2021–2022) иегері. Ол сондай-ақ ҚазҰУ-дың «Үздік жас ғалымы» (2022) және «ЖОО үздік оқытушысы» (2023) атақтарына ие болған. Ж.Т. Тауанов жетекші халықаралық журналдарда 35-тен астам ғылыми мақаланың авторы. Оның ғылыми еңбектеріне Scopus базасында 728 рет сілтеме жасалған, h- индексі – 15.