1956 жылғы 9 тамызда Алматы облысының Талғар қаласында дүниеге келген. 1973 жылы Талғар қаласындағы №1 орта мектепті бітірді. 1973–1974 жылдары «Алма-Ата» колхозының (Талғар ауданы) құрылыс бригадасында жұмысшы болып еңбек етті. 1974 жылдан 1979 жылға дейін С. М. Киров атындағы Қазақ мемлекеттік университетінде білім алды. 1980–1988 жылдар аралығында Қазақ КСР Әділет министрлігінің Қазақ сот сараптамасы ғылыми- зерттеу институтында алдымен лаборант, кейін сарапшы, кіші ғылыми қызметкер, аға ғылыми қызметкер болып жұмыс істеді, ал 1986 жылғы ақпаннан бастап трасология және сот-баллистикасы сараптамалары бөлімінің меңгерушісі қызметін атқарды. 1982–1984 жылдары КСРО Әділет министрлігінің Бүкілодақтық сот сараптамасы ғылыми-зерттеу институтының (Мәскеу қ.) күндізгі аспирантурасында оқып, 1984 жылғы 20 қарашада «Киімнің механикалық зақымдануларына трасологиялық сараптама» тақырыбында кандидаттық диссертация қорғады. 1988 жылы конкурс арқылы С. М. Киров атындағы Қазақ мемлекеттік университетіне криминалистика кафедрасының доценті лауазымына қабылданды. Сонымен қатар Қазақ сот сараптамасы ғылыми- зерттеу институтында жетекші ғылыми қызметкер қызметін 1988–1994 жж. және 2002–2011 жж. аралығында қоса атқарды. 1994–1997 жылдары Алматыдағы ҚазМУ-дің докторантурасында оқыды. 1998 жылғы 5 ақпанда «Қылмыстарды саралауда сот сараптамасының рөлі» тақырыбында докторлық диссертация қорғады. 1999 жылғы қаңтарда заң ғылымдары докторы ғылыми дәрежесі берілді. 1999 жылғы қыркүйектен бастап – криминалистика және сот сараптамалары кафедрасының профессоры, 2000 жылғы қыркүйектен 2011 жылғы тамызға дейін – осы кафедраның меңгерушісі. 2011 жылғы қыркүйектен 2014 жылғы тамызға дейін – әл-Фараби атындағы Қазақ ұлттық университетінің заң факультетінің азаматтық құқық, азаматтық іс жүргізу, еңбек құқығы кафедрасының профессоры. 2014 жылғы қыркүйектен 2019 жылғы тамызға дейін – Т. Рысқұлов атындағы Жаңа экономика университетінің саясаттану және құқық кафедрасының профессоры. 2019 жылғы қыркүйектен 2021 жылғы тамызға дейін – ҚР ІІМ Алматы академиясының жедел-іздестіру қызметі кафедрасының профессоры. 2021 жылғы қыркүйектен қазіргі уақытқа дейін – «Narxoz» университеті, Құқық және мемлекеттік басқару мектебі, «Құқық» білім беру бағдарламасының профессоры. 2008–2013 жылдары – «Қазақстан ипотекалық компаниясы» АҚ Директорлар кеңесінің тәуелсіз директоры, Алматы қ. 2001 жылы профессор ғылыми атағы берілді.