1976 ж. 22 наурызда Ақтөбе облысы Алға ауданы Қарабұлақ ауылында мұғалімдер отбасында дүниеге келген. 1992 ж. Алматы қ. қазақ тілі мен әдебиетін тереңдете оқытатын №2 Республикалық мектеп- интернатын алтын медальмен бітірген. 1996 ж. әл-Фараби атындағы ҚазМҰУ шығыстану факультетін үздік дипломмен бітіріп, «Шығыстанушы-филолог, орта оқу орындарындағы араб тілі мен әдебиеті пәндерінің оқытушысы» біліктілігі бойынша бакалавр, 1998 ж. магистратураны үздік дипломмен аяқтап, «Елтану, шығыс филологиясы» біліктілігі бойынша филология магистрі дәрежесіне ие болған. 2017-2019 жж. Қ. Жұбанов ат. АӨМУ-де «Шетел филологиясы», 2020-2022 жж. «Құқықтану» мамандықтары бойынша оқып, бакалавр дәрежесіне ие болған. 2009 ж. «Ілияс Есенберлиннің «Көшпенділер» трилогиясы: жанр және поэтика мәселелері» тақырыбы бойынша диссертация қорғап, «10.01.02 – Қазақ әдебиеті» мамандығы бойынша филология ғылымдарының кандидаты ғылыми дәрежесіне, 2018 ж. «Әдебиеттану» мамандығы бойынша қауымдастырылған профессор ғылыми атағына, 2015 ж. «ЖОО үздік оқытушысы – 2015» атағына ие болған. Еңбек жолын 1996 ж. Алматы қ. №138 қазақ өнер лицейінде араб тілі пәнінің мұғалімі болып бастаған. 1998 жылдан бастап Қ. Жұбанов атындағы АӨУ-де оқытушы, аға оқытушы, доцент, профессор, филология факультеті деканының орынбасары (2002-2003), қазақ әдебиеті кафедрасының меңгерушісі (2015-2018), Ғылыми кеңестің бас ғылыми хатшысы (2018-2022), Директорлар кеңесінің корпоративтік хатшысы (2020-2021) қызметтерін атқарған. 2022-2023 жж. әл-Фараби атындағы ҚазҰУ-да Әл-Фараби орталығының аға ғылыми қызметкері, 2023 жылдан бері философия және саясаттану факультеті дінтану және мәдениеттану кафедрасының доценті, профессоры м.а., кафедра меңгерушісінің ғылыми-инновациялық жұмыс және халықаралық байланыстар жөніндегі орынбасары болып жұмыс жасайды. Ғылыми-әдістемелік еңбектерінің жалпы саны – 220, оның ішінде «Ілияс Есенберлиннің тарихи романдары: шеберлік пен көркемдік» (монография, 2015), «Қазақ әдебиетіндегі тарихи проза» (оқу құралы, 2016, 2018), «Түркі ғұламаларының тағылымдық мұрасы» (антология, авторлық бірлестікте, 2024), «Әл-Фараби мұрасы: тіл философиясы мен философия тілі» (ұжымдық монография, 2024), «Әл-Фарабидің философиялық терминдер сөздігі: арабша-қазақша-орысша» (2025) бар. ҚР Президенті Қ. Тоқаевтың Алғыс хаттарымен (2019, 2022), ҚР БҒМ Құрмет грамотасымен (2020), ҚР Тұңғыш Президенті Н. Назарбаевтың Алғыс хатымен (2021), «Қазақстан Тәуелсіздігіне 30 жыл» мерекелік медалімен (2021) марапатталған.