ҚР Ғылым және жоғары білім министрлігі Ғылым комитеті Экономика институты «Zertteu LAB» зертханасының меңгерушісі, PhD. Айсұлу Молдабекова 2013 жылдан бері ҚР Ғылым және жоғары білім министрлігі Ғылым комитетінің Экономика институтында аға ғылыми қызметкер болып жұмыс істеп келеді. Молдабекова А.Т. 2011- 2013 жылдары «Болашақ» Президенттік бағдарламасының стипендиясымен М.В. Ломоносов атындағы Мәскеу мемлекеттік университетінің магистратурасын тәмамдаған. 2020 жылы Неміс академиялық алмасу қызметінің (DAAD) «Ғылыми гранттар – докторанттарға арналған бір жылдық тағылымдама» бағдарламасы бойынша ғылыми стипендия иегері атанып, Висмар қолданбалы зерттеулер университетіндегі «Еуропалық жобалау орталығында» тағылымдамадан өтті. 2022 жылы «6D090900-Логистика» мамандығы бойынша «Improving quality of logistics services of dry ports within Eurasian transport corridors (based on the case study “Khorgos Gateway”)» («Еуразиялық көлік дәліздеріндегі құрғақ порттардың логистикалық қызмет көрсету сапасын арттыру (“Khorgos Gateway” мысалында)» тақырыбында диссертациясын қорғап, философия докторы (PhD) дәрежесін иеленді. Молдабекова А.Т. 2024 жылы «Дарын» мемлекеттік жастар сыйлығын «Ғылым» номинациясы бойынша иеленді. Еуразиялық көлік дәліздері, сандық технологиялардың логистиканы жақсартуға әсері, циркулярлы экономиканы қалыптастыру бойынша оның мақалалары әлемдік авторлар тарапынан жоғары бағаланып келеді. Scopus базасында оның 18 ғылыми мақаласы бар, оларға 184 рет сілтеме жасалған, автордың хирша h-индексі 7-ге тең.