Айдарбеков Зейінәбіл Смайылханұлы – философия ғылымдарының докторы, профессор. Автор 1990 жылы Мәскеу қаласындағы МосГУ ЖКМ-ін тарих мамандығы бойынша тәмамдаған. 1997 жылы ҚР Ғылым академиясында кіші ғылыми қызметкер болып жұмыс істеді. 1998–2000 жылдары «Қазақ Энциклопедиясы» редакциясының бас редакторының орынбасары қызметін атқарды. 2000–2002 жылдары «Казкомсервис-Аксай» компаниясының директоры болды. 2002 жылы Орал қаласындағы Менеджмент және әлемдік тілдер институтында доцент болып, дәріс берді. 2003 жылы М.Өтемісов атындағы БҚМУ-да доцент, проректор және ректордың кеңесшісі қызметтерін атқарды. 2004 жылдан бастап 10 жыл бойы ҚР Президенті Әкімшілігінің сектор меңгерушісі және Президент мұрағаты директорының орынбасары лауазымдарында еңбек етті. 2010 жылы ҚР Президенті жанындағы Мемлекеттік басқару академиясының Ұлттық мемлекеттік саясат мектебін бітіріп, мемлекеттік және жергілікті басқару мамандығы бойынша магистр дәрежесін алды. Зейінәбіл Смайылханұлы 100-ден астам ғылыми мақаланың және 5 монографияның авторы. 25.09.2024 жылы ғылым саласындағы ерекше еңбегі үшін "Ғылымды дамытуға сіңірген еңбегі үшін" №00739 төсбелгісімен марапатталды. 2024 жылғы қазанда әл-Фараби атындағы Қазақ ұлттық университетінің "Ерен еңбегі үшін" №1118 медалімен және Моңғол Халық партиясының 100 жылдығына арналған Құрмет грамотасымен марапатталды. Ғалым халықаралық қатынастар, жастар мәселелері және мемлекеттік жастар саясатын зерттеумен айналысады. 2014–2023 жылдары Абылай хан атындағы Қазақ халықаралық қатынастар және әлем тілдері университетінде қазіргі заманғы Қазақстан тарихы және дүниетанымдық пәндер кафедрасының меңгерушісі болды. 2023 жылдың 1 қыркүйегінен бастап Әл-Фараби атындағы Қазақ ұлттық университетінің философия кафедрасында профессор м.а. қызметін атқарып келеді.