Иманалы Акбар – PhD (әлеуметтік-экономикалық география), доцент міндетін атқарушы, экологиялық туризм мен қалалардың тұрақты дамуы саласындағы қазақстандық жас ғалым. Ол 1984 жылы 28 ақпанда Қытай Халық Республикасының ШҰАР Нылқы ауданында дүниеге келген. Әкесі – мешіт имамы, анасы – дәрігер. 2003 жылы Іле қазақ автономиялы облысы Құлжа қаласындағы №1 қазақ орта мектебін тәмамдап, Синьцзян қазына-экономика университетінің статистика мамандығына оқуға түсті. Университетті 2008 жылы бітірген соң Үрімші қаласындағы халықаралық туризм агенттігінде және білім беру саласында еңбек етті. 2014–2016 жылдары Л.Н. Гумилев атындағы Еуразия ұлттық университетінде география мамандығы бойынша магистратурада білім алды. 2017–2021 жылдары Қытай ғылым академиясы университетінде «Дүниежүзілік мұра нысандарындағы экотуризм дамуына тұрғындардың қатысуы: Қазақстандағы Ақсу- Жабағылы мысалында» тақырыбында докторлық диссертациясын сәтті қорғап, PhD дәрежесін алды. 2021 жылдан бері әл-Фараби атындағы Қазақ ұлттық университетінің рекреациялық география және туризм кафедрасында оқытушылық қызмет атқарып келеді. 2024 жылы доцент міндетін атқарушы ғылыми атағы берілді. Ғалымның негізгі ғылыми қызығушылықтары – қала географиясы, ақылды қалаларды тұрақты жоспарлау, экологиялық және ауылдық туризм, табиғи-рекреациялық аумақтарды басқару, community-based tourism және GIS негізіндегі экологиялық жоспарлау. Ол Қытай мен Орталық Азия кеңістігін қамтитын бірнеше халықаралық ғылыми жобаларға қатысқан. Иманалы Акбар – 30-дан астам ғылыми еңбектің авторы, оның ішінде Web of Science және Scopus базаларында жарияланған 15 тен астам мақалалар мен ағылшын тіліндегі 1 монографиясы бар. Нақтырақ айтсақ соның ішінде Web of Science Core Collection (7 мақала, H Index – 3), Scopus (17 мақала, H Index – 6). Оның зерттеулері Қазақстандағы экологиялық туризм мен қалалардың тұрақты дамуын ғылыми тұрғыда негіздеуге елеулі үлес қосып келеді. Үйленген, жұбайы – Балжан Кенесбекқызы, Алматы облысы Талғар ауданындағы орта мектепте мұғалім.