Бекбау Бақберген Ермекбайұлы 1978 жылы 2 ақпанда Түркістан облысы Қазығұрт ауданы Жаңаталап бөлімшесінде дүниеге келген. Жаңаталап орта мектебінің 9-сыныбын 1993 жылы үздік бітіріп, Шымкент автомеханикалық техникумына түсті. Шымкент автомеханикалық колледжін 1997 жылы техник-механик мамандығы бойынша үздік дипломмен аяқтады. Шымкент былғары аяқкиім зауытында 2000-2001 жылдары жұмыс істеді. Әл-Фараби атындағы Қазақ ұлттық университетіне (ҚазҰУ) 2001 жылы оқуға түсті. Оқу барысында әскери кафедраны тәмамдады. ҚазҰУ жанындағы Математика және механика ғылыми-зерттеу институтының сұйық және газ механикасы зертханасында 2004-2006 жылдар аралығында лаборант ретінде жұмыс істеді. «Механика» мамандығы бойынша «механик, қолданбалы математик» біліктілігін 2006 жылы алып шықты. ҚазҰУ-да PhD докторантурасына 2007 жылы түсіп, «Ұңғымаға жақын аймақ ағындарының өнімділікке әсерін зерттеу» тақырыбында 2010 жылы профессор А. Қалтаевтың ғылыми жетекшілігімен диссертация қорғады. Зерттеулер Польшадағы AGH Ғылыми-техникалық университетінің мұнай және газ бұрғылау факультеті және АҚШ-тағы Луизиана штаты университетінің мұнай инженериясы факультетімен бірлесе отырып жүргізілді. ЮНЕСКО стипендиясын 2008 жылы иеленіп, AGH Ғылыми- техникалық университетінде профессор С. Нодждің жетекшілігімен тағылымдамадан өтті. Луизиана штаты университетінде 2009-2010 жылдары PhD диссертациясын орындау барысында профессор А. Войтановичтің жетекшілігімен ғылыми тағылымдамадан өтті. «Болашақ» халықаралық стипендиясының иегері атанып, 2012-2015 жылдары Остиндегі Техас университетінде постдокторлық зерттеулер жүргізді. UTCHEM химиялық композициялық симуляторын әзірлеу жобасына 14 ай бойы қатысты. Сонымен қатар Лотарингия университетінің профессоры Михаил Панфиловпен бірлесіп су ағынын оқшаулауды сандық моделдеу бойынша жұмыс жасады. «Ньютон - Аль-Фараби» бағдарламасының грантын 2016 жылы ұтып алып, Шеффилд университетінде (Ұлыбритания) 6 айлық зерттеу жүргізді. Қ.И. Сәтбаев атындағы ҚазҰТЗУ-дың мұнай инженериясы кафедрасында 2017 жылдан бастап жұмыс істеп, 2018-2019 жылдары профессор қызметін атқарды. «ҚМГ Инжиниринг» ЖШС Жаңа технологиялар және мұнай алу тиімділігін арттыру департаментінің директоры ретінде 2019-2020 жылдары қызмет атқарды. «ҚМГ Инжиниринг» ЖШС-ның Гидродинамикалық модельдеу және мұнайды тиімді өндіру қызметінің жетекші ғылыми қызметкері ретінде 2020-2025 жылдары қызмет атқарды.