Түсіпқалиева Роза Қуанқызы 1958 жылы Гурьев облысы, Махамбет ауданы, Тұщықұдық селосында дүниеге келді. Ұлты – қазақ. Білімі – жоғары. 1979 жылы М.С. Киров атындағы ҚазМУ-дің филология факультетіне оқуға түсіп, 1982 жылы қазақ тілі мен әдебиеті пәндерінің оқытушысы мамандығы бойынша бітірген. 1987-1992 жыл аралығында Алматы қаласындағы №143 орта мектепте қазақ тілі мен әдебиет пәнінің мұғалімі болып жұмыс істеді. 1992 жылдан бастап қазіргі филология, әдебиеттану және әлем тілдері факультеті мемлекеттік тіл кафедрасының оқытушысы, аға оқытушысы, доценті қызметтерін атқарды. Жалпы ғылыми-педагогикалық еңбек өтілі – 32 жыл. 2007 жылы филология ғылымдарының докторы, профессор Г.Смағұлованың жетекшілігімен «Қазақ лексикографиясы: екітілді шағын сөздіктердің құрылымы» кандидаттық диссертация қорғап, 2008 жылдың 23 сәуірде ҚР БжҒМ Білім және ғылым саласындағы бақылау комитетінің шешіміне сәйкес филология ғылымдарының кандидаты ғылыми дәрежесін алды. Р.Қ. Түсіпқалиева орыс аудиториясына арналған қазақ тілінің бағдарламасы мен әдістемелік нұсқауларын әзірлеп, бірнеше методикалық нұсқаулары жарық көрді. Физика факультетіне арналған «Мәтіндер жинағы» /1999ж./ мен осы факультетке арналған «Қазақша-орысша,орысша- қазақша терминдер сөздігі» /2011ж./ шықты. Сондай-ақ, жалпы, тіл біліміндегі жаңалықтар мен өзекті мәселелерге дер кезінде үн қосып, республикалық ғылыми- әдістемелік конференцияларда бірнеше баяндама жасады. Жалпы ғылыми журналдарда, конференцияларда жарияланған материалдарының жалпы саны 50-ден асады. Білімді жетілдіру және арттыруға арналған семинар, конференция сертификаттарының авторы.